ஏ.என்.ஸ்டுடியோஸ் தயாரிப்பில் எஸ்.டி.குணசேகர் இயக்கத்தில் உருவாகி உள்ள களவு செய்யபோறோம் படத்தின் பாடல்கள் வெளியீட்டு விழாவில் என்ன வெங்காயத்துக்கு பாட்டெழுதணும் எனப் பேசி சர்ச்சையை கவிஞர் சிநேகன் கிளப்பியுள்ளார்.
விழாவில் கவிஞர் சிநேகன் பேசியதாவது, ”களவுசெய்ய போறோம் படக்குழுவினருக்கு என் வாழ்த்துக்கள். இந்தபடத்தின் இசையமைப்பாளர் வி.தஷி எனக்கு 20 ஆண்டு கால நண்பர். படத்தின் தயாரிப்பாளர் மற்றும் நாயகர்களில் ஒருவரான சலீம் எனக்கு ஏற்கெனவே தெரிந்த நண்பர். அவர்களுக்கும் படக்குழுவினருக்கும் மீண்டும் என் வாழ்த்துக்கள்.
இந்தப் படத்தின் மூலம் பாடலாசிரியராக அறிமுகம் ஆகும் பாடலாசிரியர் கவிதாவுக்கு வாழ்த்துக்கள்.இந்த படத்தின் பாடல்கள் வார்த்தைகள் புரியும்படியாக பாடலாசிரியர்கள் எழுதியுள்ளனர். அந்தவார்த்தைகள் கேட்கும் படி இசையமைப்பாளர் இசையமைத்துள்ளார்.
ஆனால் இன்றைய பாடலாசிரியர்களில் சிலர் எழுதும் பாடல் வரிகள் என்ன என்றே புரிவதில்லை.வரிகளும் வார்த்தைகளும் புரிந்தால் தானே, அந்த வார்த்தைகள் கேட்கும்படி இசையமைக்க முடியாது.
அப்படி புரியாத பாடல்களை என்ன வெங்காயத்துக்கு எழுத வேண்டும்? ஆங்கிலம், வேற மொழிவார்த்தைகள் கலந்து புரியாத பாடல்களை எழுதுவதை விட்டுவிட்டு நம் தமிழ்மொழியில் எழுதுங்கள்.அதையும் புரியும்படி எழுதுங்கள்” என்று பாய்ந்தார்.
மேலும் பேசும் போது,”சினிமா விழா மேடைகளில் தயவுசெய்து பொன்னாடை போர்த்தாதீர்கள். அதற்கு பதிலாகக் கலந்து கொள்ளும் பெண்களுக்கு சேலையும் ஆண்களுக்கு வேட்டியும் அன்பளிப்பாக தாருங்கள்.வேட்டியும் சேலையும் நம் கலாச்சாலம். அதை வளர்ப்போம் ”என்றும் குறிப்பிட்டார்.
விழாவில் இயக்குநரும் நடிகருமான சந்தானபாரதி, நடிகர்கள் நிதின் சத்யா, பவர் ஸ்டார், மகாநதிசங்கர் மற்றும் பலர் கலந்து கொண்டனர்.
